Хурлыг ХАБЭА-н Үндэсний хорооны дарга, Гэр бүл, хөдөлмөр, нийгмийн хамгааллын сайд Л.Энх-Амгалан удирдаж, ажил олгогч, ажилтны талын төлөөллүүд бүрэн бүрэлдэхүүнээрээ хуралдан зохих шийдвэрүүд гаргалаа.
Тус хурлаар үйлдвэрлэлийн осол, мэргэжлээс шалтгаалах өвчнөөс урьдчилан сэргийлэх арга хэмжээний 2025 оны үйл ажиллагааны төлөвлөгөөг хэлэлцэж, дэмжигдсэн саналуудыг нэгтгэн нийгмийн даатгалын хуулийн хүрээнд Нийгмийн даатгалын үндэсний зөвлөлөөр хэлэлцүүлэн батлуулахаар шийдвэрлэв.
Хөдөлмөрийн аюулгүй байдал, эрүүл мэндийн тогтолцооны шинэчлэлийг хэрэгжүүлэх 2025-2028 оны үйл ажиллагааны төлөвлөгөөг талуудад танилцуулсан бөгөөд үндсэн 6 зорилтын хүрээнд Монгол Улсын ХАБЭА-н цаашид авч хэрэгжүүлэх бодлогыг тодорхойлсныг талууд сайшааж, уг төлөвлөгөөг хэрэгжүүлэхэд хамтран ажиллахаа илэрхийлж, үүнд төр, ажил олгогчийн манлайлал чухал болохыг онцлон тэмдэглэв.
Мөн, хөдөлмөр, нийгмийн хамгааллын салбарын 2024 онд гүйцэтгэсэн хяналт шалгалтын тайлантай танилцаж, нийгмийн түншлэгч талууд байр сууриа илэрхийлж, цаашид авах арга хэмжээнд санал хүсэлтээ илэрхийлэв.
