МЭХГУУ-н ҮЭ-ийн холбооны дарга Д.Долгор, эрчим хүчний салбар хариуцсан нарийн бичгийн дарга Д.Эрдэнэбат, тус холбооны гишүүн байгууллагуудын ҮЭ-ийн хороодын төлөөлөл болох УБЦТС ТӨХК-ийн ҮЭ-ийн хорооны дарга Н.Балжинням, ЦДҮС ТӨХК-ийн ҮЭ-ийн хорооны дарга Ц.Мөнхбаатар, ДЦС-3 ТӨХК-ийн ҮЭ-ийн хорооны дарга Ш.Энхсаран, Дарханы ДЦС ТӨХК-ийн ҮЭ-ийн хорооны дарга Ж.Хүдэр, ДЦС-4 ТӨХК-ийн Эрчим ҮЭ-ийн хорооны дарга Ж.Энхзул нар Засгийн газрын хэрэгжүүлэгч агентлаг Төрийн өмчийн бодлого, зохицуулалтын газрын дарга Б.Цэнгэл, Төрийн өмчийн удирдлага, зохицуулалтын хэлтсийн дарга Ц.Баяр-Эрдэнэ нарын албаны хүмүүстэй уулзлаа.
МЭХГУУ-н ҮЭ-ийн холбооны зүгээс “Засгийн газраас ирүүлсэн чиглэлд дурдсан шинээр бий болгох удирдлагын чиг үүрэг нь Төрийн хэмнэлтийн тухай хуулийн 5.5.4-т заасан албан тушаалтнуудын гүйцэтгэх чиг үүрэгтэй давхацсан тул эрчим хүчний байгууллагуудад хоёр төлөөлөгч томилж, энэ салбарт багаар бодоход 2 тэрбум төгрөгийн цалингийн зардал болон бусад зардал нэмэгдэх учир уг шийдвэрийг цуцлах, Төрийн хэмнэлтийн тухай хуулийг хэрэгжүүлэх хүрээнд хамтын гэрээ, хамтын хэлэлцээрийг хэрэгжүүлэхэд саад учирсаар байгаа тул тус хуулийн 15.1.3-г ашиглан акт тавихыг зогсоох, хамтын гэрээ, хэлэлцээрийг байгуулахад ҮЭ-ийн тухайн шатны байгууллагыг мэдээ, мэдээллээр бүрэн хангах, ҮЭ-үүдийн бие даасан хараат байдал, хөрөнгө санхүүд Төрийн хэмнэлтийн хуулиас болж захиргаанаас тодорхой хэмжээний нөлөөлөл, дарамт ирж байгааг зогсоохтой холбоотой асуудлуудыг илэрхийлж, шаардлага хүргүүлсэн.
Төрийн өмчийн бодлого, зохицуулалтын газрын дарга Б.Цэнгэл “МЭХГУУ-н ҮЭ-ийн холбооны зүгээс гишүүн байгууллагуудаасаа тодорхой саналуудыг авч Хэмнэлтийн хуулийг хэрэгжүүлэх Ажлын хэсэгт хүргүүлбэл бид асуудлыг илүү үр дүнтэй шийдвэрлэх боломжтой” хэмээгээд, тус холбооны албан хүсэлтийн дагуу төрийн өмчит аж ахуйн нэгжүүдэд хуулийн хүрээнд хамтын гэрээ байгуулахад шаардлагатай тоон мэдээлэл хүргүүлж, хамтын гэрээ, хэлэлцээрийг хэрэгжүүлж ажиллахаа илэрхийллээ. Тэрбээр Засгийн газрын дэргэд төрийн өмчит “Эрчист Монгол” нэгдлийг байгуулж, эрчим хүчний салбарын төрийн өмчит компаниудыг долоон охин компани болгон нэгтгэхэд баримталж буй бодлогоо танилцуулж, цаашид бүх шатандаа ҮЭ-ийн байгууллагатайгаа түншилж ажиллах чиглэлийг зөв гэж үзэж байгаагаа дурдлаа. Мөн Төрийн хэмнэлтийн тухай хуулийн хэрэгжилтийг хангуулах, Үндэсний аудитын газарт хандан хөдөлмөрийн харилцаатай холбоотой хууль тогтоомжийн мэдлэг мэдээллийг сайжруулах талаарх ҮЭ-ийн санал, байр суурийг ЗГХЭГ-ын түвшинд танилцуулж, цаашид үр дүнтэй харилцан хамтын ажиллагаагаа үргэлжлүүлнэ гэдгээ илэрхийлэв.
